Samua yang bae deng sempurna, itu dari Tuhan Yakobus 1 : 12

12 Tu orang yang dapa cobaan kong batahang deng tetap percaya pa Tuhan, dia itu yang paling snang. Soalnya kalu dia tetap batahang sampe dia berhasil lewat samua tu cobaan, dia mo dapa hadiah tu hidop kekal yang Tuhan so janji mo kase pa orang-orang yang sayang pa Dia.
13 Kalu ada orang yang dapa cobaan kong tagoda beking tu jaha, dia itu nimbole babilang bagini, “Tuhan yang da coba pa kita!” Soalnya Tuhan nyanda perna tagoda for beking tu jaha, kong Dia lei nyanda perna kase cobaan pa orang. 14 Mar kalu orang tagoda for beking tu jaha, itu lantaran dia da iko akang tu de pe keinginan sandiri yang jaha, sama deng dia da lia tu umpan kong dia ambe lantaran dia tertarik. 15 Kong kalu tu orang iko akang tu keinginan itu, itu de pe arti dia so beking dosa. Trus kalu tu dosa so kuasai pa dia, dia pe hidop so tapisa deng Tuhan for slama-lamanya.
16 Sudara-sudara yang kita sayang, ngoni jang tatipu, bukang Tuhan tu da goda pa ngoni for beking tu jaha. 17 Soalnya samua yang bae deng sempurna tu torang da dapa, itu datang dari Tuhan di sorga. Dia itu torang pe Bapa yang da beking tu benda-benda yang ja kase trang di langit. Tu benda-benda itu ja bruba-bruba, laengkali basinar deng laengkali nyanda, mar Tuhan nyanda bagitu, Dia nyanda perna bruba, Dia slalu bae. 18 Tuhan beking torang jadi Dia pe anak-anak lewat Dia pe ajaran yang butul, itu Dia pe mau supaya torang jadi hasil yang paling utama dari samua tu Dia da beking.